भेसळयुक्त दुधाची विषारी गंगा जावळ्यातून थेट सोनाई पर्यंत जायची अन् तिथून पुढे...?'अन्न व औषध प्रशासनाची जवळयात मोठी कारवाई १५ लाख रुपये किंमतीच्या ३७ हजार ५३२ लिटर भेसळयुक्त दूधाची प्रशासनाकडून विल्हेवाट
'भेसळयुक्त दुधाची विषारी गंगा जावळ्यातून थेट सोनाई पर्यंत जायची अन् तिथून पुढे...?'
अन्न व औषध प्रशासनाची जवळयात मोठी कारवाई
१५ लाख रुपये किंमतीच्या ३७ हजार ५३२ लिटर भेसळयुक्त दूधाची प्रशासनाकडून विल्हेवाट
सांगोला (प्रतिनिधी): "भेसळयुक्त दुधाची विषारी गंगा जावळ्यातून थेट सोनाई पर्यंत जायची अन् तिथून पुढे.... आपल्या किचन पर्यंत? हे विष अनेकांनी अन्न नव्हे तर सकस आणि पौष्टिक अन्न म्हणून सेवन केलं असेल.... अगदी डोळे झाकून... कोणत्या आईने आपल्या लेकरांची भुक शमविली असेल... आजारी रुग्णांनी ते सेवन करुन आपला आजार अधिक वाढविला असेल... कोणाचं निरोगी शरीर या विषाने व्याधीग्रस्त झाले असेल... निव्वळ या विषारी दुधाने अनेकांना आपला प्रवास अर्ध्यावर सोडावा लागला असेल...या विषारी दुधाने बरचं काही केले असेल...? या विषारी दुधाने काही झाले असेल ते असेल परंतु तुकाराम मुंढे सारख्या निडर, प्रामाणिक अधिकाऱ्यांच्या रास्त भुमिकेमुळे, धाडसी कारवाईमुळे माणसात लपलेले माणसातले हैवान जगासमोर येवू लागले आहेत. हे मात्र निश्चित महाराष्ट्राच्या कानाकोपऱ्यात दबा धरून बसलेले अनेक हैवान मुंडे साहेबांच्या कारवाईमुळे जगासमोर आले आहेत.भेसळखोर हैवानांचा पूर्णपणे नायनाट करण्यासाठी राज्यकर्त्यांनी देखील मुंडे साहेबांच्या भुमिकेला राजकीय पाठबळ दिले पाहिजे.अशी जनमानसातील भावना अतिशय तीव्र आहे.या जनभावनेचा राज्यकर्त्यांनी देखील आदर करुन मुंढे साहेबांची बदली करण्याच्या भानगडीत पडू नये इतकेच...!"
राज्यातील दबंग प्रशासकीय अधिकारी म्हणून ओळख असणाऱ्या तुकाराम मुंडे यांनी अन्न व औषध प्रशासनाच्या आयुक्तपदाचा पदभार स्वीकारल्यापासून संपूर्ण राज्यभर दुधात आणि अन्नपदार्थात भेसळ करणाऱ्या रॅकेटचा पर्दाफाश केला जात आहे. राज्यभर दुधात होत असणाऱ्या भेसळीचे पेव आता जवळा ता. सांगोला येथे येऊन पोहोचले आहे. जवळा येथील सोनाई उद्योग समूहचा अजिंक्यराणा दूध संकलन केंद्रावर अन्न व औषध प्रशासनाने छापा टाकून तब्बल ३७ हजार ५३२ लिटर भेसळयुक्त दूध ताब्यात घेतले आणि त्याची विल्हेवाट लावली. अन्न व औषध प्रशासनाच्या वतीने ही कारवाई शनिवार दि ११ जुलै रोजी जवळा ता. सांगोला येथील बुरंगेवाडी येथे करण्यात आली.
दुधात भेसळ करण्याचा हा गोरखधंदा जवळा ता. सांगोला येथील संदीप उर्फ गोट्या समाधान गावडे, श्रीकांत समाधान गावडे, विजय शामराव पाटील व अन्य मंडळीकडून चालवला जात असल्याची चर्चा परिसरात रंगली आहे. गेल्या काही महिन्यांपूर्वी बुरंगेवाडी येथे अजिंक्यराणा दूध संकलन केंद्रामार्फत सोनाई उद्योग समूहाला दूध पुरवठा केला जातो. अल्पावधीतच या दूध संकलन केंद्रावर हजारो लिटर दूध संकलन होऊ लागल्याने या संकलन केंद्रावरून दुधात भेसळ केली जात असल्याची चर्चा जवळा आणि परिसरात रंगू लागली होती. याबाबतची माहिती अन्न व औषध प्रशासनाला मिळाल्याने प्रशासनाच्या अधिकाऱ्यांनी शनिवार दि ११ जुलै रोजी दुपारी अचानक बुरंगेवाडी येथील अजिंक्यराणा दूध संकलन केंद्रावर छापा टाकून येथील दुधाचे नमुने ताब्यात घेतले. यावेळी या दुधात भेसळ असल्याचा संशय आल्याने याबाबतची तपासणी केली असता या दूध संकलन केंद्रावरून दुधात मोठ्या प्रमाणावर भेसळ होत असल्याचे अन्न व औषध प्रशासनाच्या अधिकाऱ्यांचे निदर्शनास आले. त्याचबरोबर या दूध संकलन केंद्रावर संकलन
आणि चिलिंग युनिटचा वैध परवाना नसणे जागेवर केलेल्या चाचणीत SNF चे प्रमाण विहित नमुन्यात दिलेल्या प्रमाणापेक्षा कमी असणे, माल पुरवठा आणि खरेदीबाबत कोणतीही पद्धतशीर नोंद नसणे, व अन्न औषध प्रशासनाने घालून दिलेल्या बहुतांशी सर्व नियमांचे उल्लंघन होत असल्याचे धक्कादायक बाब या कारवाईत समोर आली. सदरची कारवाई अन्नसुरक्षा आयुक्त साहेबराव देसाई अन्नसुरक्षा अधिकारी गणेश कदम व अन्नसुरक्षा अधिकारी मंगेश लवटे यांच्या पथकाने केली. अन्न सुरक्षा विभागाने सांगोला तालुक्यात भेसळखोरांचा भांडाफोड केल्याने तालुक्यातील सामान्य नागरिकांतून या विभागाच्या निर्भीड कामाचे कौतुक होत आहे.
दुधात भेसळ करणाऱ्या मंडळीवर मकोका लावा
जन्माला आल्यापासून ते शेवटचा श्वास घेईपर्यंत दूध हे मानवी आहारातील सर्वात महत्त्वाचा घटक आहे. हजारो लोकांच्या जीवनाशी खेळ करून आपले उखळ पांढरे करणाऱ्या दुधात भेसळ करणाऱ्या जवळा ता सांगोला येथील भेसळखोरांवर अन्न व औषध प्रशासनाचे आयुक्त तुकाराम मुंडे आणि त्यांच्या प्रशासनाने मकोकासारखा कायदा लावून कठोर कायदेशीर कारवाई करावी अशी मागणी आता सांगोला तालुक्यातून पुढे येत आहे
Comments
Post a Comment